ఏది గొప్ప ?

ఉదయ భానుడి కిరణాలకు మొగ్గలు విచ్చుకుంటున్నాయి

ఆ దృశ్యంలో గొప్పదనము,

విచ్చుకున్న ఆ మొగ్గలదా ?
వికసింప జేసిన ఆ కిరణాలదా ?

విద్వాంసుని పెదవులు వేణువు పై సుస్వరాలు పలికిస్తున్నాయి

ఆ మాధుర్యంలోని గొప్పదనము,

స్వరాలు పలికిన ఆ వేణువుదా ?
పలికింప జేసిన ఆ పెదవులదా ?

శిల్పి చేతిలో రాయి దేవుని ప్రతిమ గా రూపు చెందుతోంది

ఆ ముఖ వర్చ్చస్సు లోని గొప్పదనము ,

ప్రతిమ గా మారిన ఆ రాతిదా ?
అలా మలచిన ఆ శిల్పిదా ?

కళాకారుని చేతిలో మట్టి అందమైన బొమ్మ రూపు సంతరించుకుంటోంది

ఆ సింగారం లోని గొప్పదనము,

బొమ్మలా మారిన మట్టిదా ?
అలా మలచిన ఆ చేతులదా ?

తొలకరి చినుకుకు మయూరము పూరి విప్పి నాట్యమాడుతోంది

ఆ హోయల లోని గొప్పదనము

నాట్యవిలాసము ప్రదర్శించిన ఆ మయూరనిదా ?
పరవసింపజేసిన ఆ వర్షపు జల్లుదా ?

సానపెట్టిన పిదప రంగు రాళ్ళు వజ్రాలు గా రూపాంతరము చెందుతున్నాయి

ఆ రంగుల కాంతుల లోని గొప్పదనము,

మెరుపు సంతరించుకున్న ఆ వజ్రాలదా ?
మెరుపు తెచ్చిన ఆ సాన రాతిదా ?